काठमाडौँ । गैरआवासीय नेपाली संघ (एनआरएनए)को १० औँ महाधिवेशनबाट निर्वाचित भएका अध्यक्ष हुन्, विनोद कुँवर ।

सोही महाधिवेशनमा अर्को समूहबाट बद्री केसी, कुल आचार्य र रविना थापा अध्यक्ष बन्दा उनी पूर्वअध्यक्ष शेष घलेको नेतृत्वमा भएको महाधिवेशनबाट अध्यक्ष चयन भएका थिए । 

१० औँ महाधिवेशन दुई तिर भएपनि एनआरएनएको आधिकारिकता परराष्ट्र मन्त्रालयले तीन अध्यक्ष भएकोतिर दिएपछि कुँवर अदालत गएका थिए । सोही आधिकारिकतासम्बन्धी विवादमा सर्वोच्च अदालतले २०८० चैतमा एकता महाधिवेशन गराउनेगरी परमादेश दियो । 

अदालतले परमादेशमात्रै दिएन १० औँ महाधिवेशनपछिको एनआरएनएको सबै गतिविधि अवैध ठहर गर्दै एकताको महाधिवेशन गर्नेगरी पूर्वअध्यक्ष शेष घलेको नेतृत्वमा २०७८ माघ १ को बिन्दुबाट गतिविधि सुरु गरेर एकता महाधिवेशन गराउन आदेश दियो । सोही घले नेतृत्वको कमिटीमा सर्वोच्चले १३ जना चयन गरेकोमा एक जना थिए, कुँवर नै । 

सर्वोच्चको परमादेशअनुसार १० औँ महाधिवेशनलाई आफूले आधिकारिकता नपाएपनि उनले एकता महाधिवेशन गराउनका लागि महत्वपूर्ण भूमिका खेलेको एनआरएनए वृत्तमा चर्चा छ । बोलेर भन्दा पनि काम गरेर नतिजा निकाल्नुपर्छ भन्ने मान्यता राख्ने कुँवरले आफ्नो सबै व्यापारिक व्यस्ततालाई एक ठाउँमा राखेर एनआरएनएको एकता महाधिवेशनलाई सफल बनाउन ठुलो भूमिका खेलेका थिए । जसअनुसार उनले सरकारी निकायहरुसँग समन्वयका साथै सर्वोच्चको फैसलाअनुसार अघि बढ्नका लागि आवश्यक सबै प्रशासनिक र समन्वयकारी भूमकिा निर्वाह मात्रै गरेनन् पूर्वअध्यक्ष शेष घलेको बलियो सारथिका रुपमा काम गरे । यस्तै उनी एकता महािधवेशन सफल बनाउन विभिन्न देशको भ्रमणमा पनि पुगे । 

टीममा रहेकाहरुसँग आवश्यक समन्वयका साथै एकता महाधिवेशनसम्बन्धी सबै रणनीतिक कार्यलाई उनले कुशलतापूर्वक पार लगाएकै कारण पनि एकता महाधिवेशन सफलतापूर्वक सम्पन्न हुन पाएको बताइएको छ । 

कोरियाका स्थापित व्यवसायी कुँवरको नेपालमा समेत कोरियन प्रविधिमा आधारित व्यवसायहरु रहेका छन् । उनले भने, ‘कुनै पनि काम थालेपछि सफलतापूर्वक सम्पन्न गनुपर्छ भन्ने मेरो मान्यता छ । सोहीअनुसार इमानदार भएर काम गर्दा सफलता हात पर्छ भन्ने अनुभूति भएको छ ।’ सबैको टीमवर्कका कारण एकता महाधिवेशन वैशाख २० र २१ मा गरेर महेशह श्रेष्ठलाई सर्वसम्मत नेतृत्व चयन गर्न सकिएको बताए । 

उनले एनआरएनएलाई अझै पनि एकताबद्ध गराउन बाँकी रहेको भन्दै आगामी दिनमा पनि भूमिका खेल्न तयार रहेको बताए ।